Kalhanoğulları'ndan Şirvan Han neslinden Oğuz Taifesi Oğuz Beglerinden Sa'adeddin derler bir Beg var idi. Şirvan vilayetinden gelüb çıkmış idi. Çok kabile idi. Rast on bin oba idi. Konargöçer idi. Yazın Sivas'da Kayseriyye yaylakları idi. Kış diyar-ı 'Acem'e giderler idi.
Bunlara Oğuz taifesi derler idi. Ekseriiya Ermeni kafir ile ceng ederler idi. Beglerine Sa'adeddin, karındaşına 'İmameddin derler bir bahadır yiğit idi. Oğlu var idi. Nureddin derler idi. Türkman taifesini bunlar, anlar-bile konargöçer idi. Türkman taifesinin beğine Hayreddin derler idi. Bir yıl baharın, eğer Türkman eğer Oğuz yaylaka çıkdılar. Sa'adeddin vefat idüb Nureddin beğ eylediler. Türkman beği Hayreddin eydür Nureddin'e:
- Ey Nûreddin Beg! Konub göçmekden usandık. Bari Herakle kal'asını kafir elinden alub mekan edinsek dedi. Oğuz begleri bu sözü ma'kul gördüler.
Ravi eydür: 'Osmanoğlu Sultan Mehemmed İstanbul'u kafir elinden alduğu zamanda, yedi yıl sonra Gedük Ahmed Paşaya emr edüb Larende'ye gönderdi. Gedük gelüb altı yıl sefer edüb ahır Larende'yi Karamanoğlu Kasım begin elinden alub sarayı yerine hisar yapub ne kadar 'azim bina var ise yıkub hisara harc eyledi.
Koyun kuzu sürer gibi oğlun ve uşağın önüne bırağub şeyh 'ulema ve fukara feryad ederken yigirmi (161b) otuz bin Karatağ dibine cem' edüb kendüsi gözlerine karşu ol ziba sarayları köşkleri Cami-i Sultan ve Cami-i Nizam-şahi, Cami'-i Kaşiye, Cami-i Hasan Basri, Cami'-i Karaman cümle şehri yere beraber edüb andan sonra dönüb on yedi bin er ile bu denlü fukaraları yayak, oğlu ile uşağı ile döge döge sürmeye başladı.
